Benvidos e benvidas á UDC

O curso en A Coruña vai a representar para vós unha experiencia extraordinaria que, con toda seguridade, marcará as vosas vidas. Será un ano en que case todo será novidade: na Universidade teredes novos compañeiros e profesores, ademais dun sistema de estudio distinto ao que estades acostumados; a convivencia coa vosa familia de acollida serviravos para coñecer e entender mellor como é a sociedade española; e con toda seguridade vos integraredes na vida estudantil coruñesa e poderedes gozar das múltiples oportunidades que ofrece a cidade e a Universidade para o ocio e a cultura.

Precisamente ese contacto, esa experiencia directa con outras formas de vivir é o que vos enriquecerá e fará que este ano sexa inesquecible.

A través desta web, e tamén a través das xornadas de orientación, queremos ofrecervos información variada coa que pretendemos facilitar a adaptación á vosa nova vida.

Os que nos ocupamos deste intercambio estámonos a esforzar para que todo saia ben, pero para nós tamén é unha experiencia nova. Por iso agradeceriámosvos moito que nos comentásedes as vosas impresións sobre calquera aspecto do programa, tanto se son positivas como negativas. O director do programa estará aberto a escoitarvos, a ter en conta e atender as vosas suxestións e ideas. Tamén vos pregamos que sexades comprensivos cos nosos fallos, que sempre intentaremos corrixir.

Estamos desexando que cheguedes a Coruña para poder empezar xuntos esta experiencia común.

Un saúdo en nome de todos os que estamos implicados neste proxecto.
 

Félix Córdoba
Director do programa na Univ. da Coruña